景賢里變竟然不理

景賢里變竟然不理

20070918

景賢里被拆，唔使講梗係政府失職，全因為古物及古蹟條例既保護唔到古物古蹟，又保障唔到擁有人嘅利益。景賢里變成「竟然不理」。縱使被列為古蹟，條例無限制清拆權利。更無將賠償制度化，每次都係好似打天才波，鍾意賠就賠，令到古蹟擁有人覺得無保障，亦無所適從。

本來條例嘅不足可以令政府做嘢「更有彈性」，就係因為咁，皇后碼頭先可以被拆。不過，亦係條例嘅不足，令政府有心殺賊，但無力回天，真係惡人自有惡人磨。

今日景賢里搞到咁，其實一啲都唔奇怪。大家睇下尖沙咀警署對面個古物古蹟辦事處就知，辦事處所在嘅地方係西式磚砌建築，翻新個時髹上厚厚嘅油漆。形象之醜，只可以用惡俗嚟形容。咁無品味嘅人又點會識得保育。

有啲評論員話單野搞到咁，都係啲保育人士日嘈夜嘈，搞到業權人驚政府干涉佢他嘅擁有權，於是提早清拆咁話喎。呢班人明顯唔知咩係公共財(Common goods)同無基本邏輯。

就算某樣嘢係私人財產，但如果涉及社會利益，就未必係財產擁有者可以話事。好似紫禁城咁，本來係愛新覺羅家所有，咁係唔係佢地可以收返業權用黎搞主題公園?

將責任歸咎保育人士又係無腦。舉個例，如果有個有錢佬個仔俾人綁架，綁匪要求贖金。咁佢第一時間報警，但啲綁匪知道後撕票。於是啲警察告個有錢佬誤殺，因為如果佢唔報警察，佢個仔就唔使死啦。

其實要解決呢單野一啲都唔難，既然係私產，用錢就可以解決。之後，認認真真立法保護古物古蹟同建立賠償機制，就唔會再有第二「竟然不理」。