家有菲傭 子女英語更好

家有菲傭 子女英語更好

20070804

7月27日，明報公布咗香港大學謝鍚金教授一項最新研究結果。個研究訪咗4300個小四學生，當中42%屋企係有請菲傭。因為菲傭有助製造英語環境，所以有菲傭嗰d學生嘅測試明顯比冇菲傭嘅學生好。

因為搵唔到詳細資料，所以我send咗email俾謝教授，睇下邊度可以睇到佢嘅研究結果，不過好可惜，謝教授話佢個研究仲未publish，叫我睇返明報。真係唔明啦，仲未publish就上晒報紙，有冇需要咁心急搶閘呢?

雖然4300個小四學生，呢個sample size好大，不過佢只係訪問咗小四學生，但係無再研究其他年級嘅學生作為比較。唔好唔記小學d英文其實好簡單，小四年級大概只係學simple present、present continuous同simple past tense。屋企有個菲傭對於學生可以掌呢個三tense係可以理解，但係唔代表d學生往後d英文因為屋企有個菲傭而有所精進。

又唔清楚呢4300係點樣抽出黎，家庭背境係乜又唔知，只係注意佢地屋企有冇菲傭，未免有d偏頗。姑且當佢地隨機抽樣，但係冇考慮學生嘅家庭背境，真係連初中生都知個研究有問題啦。例如個學生屋企比較富裕，所以有能請菲傭，同時因為比較富裕，亦都有錢買課外教材或者書藉俾d仔女。咁點解釋佢地屋企會有錢d呢，原來d學生父母本身都有高學歷，課餘可以教下d仔女英文，所以呢,菲傭只係附屬現像，並非決定性因素。正如每逢落雨前，d蜻蜓就會周圍飛，雖然你用統計學計一下佢地個相關系數可能好高，但係我地唔可以話落雨係由蜻蜓引起架嘛。唔考慮其他客觀因素嘅可能，最容易造成歸因錯誤。

個研究只係考慮d學生測驗成績，須知道小學測驗一般都係未有oral，如果考慮埋讀音的話，個結果可能就會冇咁樂觀。而且又冇調查d菲傭嘅學歷同英語能力，雖然其中有部份有大學學歷，但肯唔係全部都係，更加唔保證英文一定好，有d菲傭嘅英文水平真係拍得住港式英文。況且native speaker都唔一定英文好，稍為用腦諗下香港有幾多人d中文見得人就知啦。

謝教授話菲傭有助製造英語環境，但係請一個菲傭一年都需要幾萬錢。近期哈利波特出新書，有d細路話幾歲己經可以睇得英文版。買哈利波特最多咪千幾蚊，去圖書館借仲唔洗錢添。所以，要英文好都唔一定要請菲傭。而且你話請菲傭定係睇哈仔抵d呢?

愛因斯坦叫我地避免”Theory determines observations”，不過可以做到嘅人就唔係咁多。因為未有詳細報告，只可以用明報刊載嘅資料黎分析，希望日後正式出版嘅研究結果會有清楚嘅解說。

可靠性(0-4): 0

分類: Junk

相關網址:

Prof. TSE Shek-kam’s Academic Staff Homepage

http://www.hku.hk/curric/sktse/

Yahoo!新聞

http://hk.news.yahoo.com/070726/12/2ccch.html