窂騷

20071125

浪人志係咪有內幕消息?

前星期浪人兄喺大市分析中話限制深圳居民同企業每日提款額嘅政策好快就會取消。話音剛落，2007年11月19日新聞報導中，總理溫家寶話呢個政策過於簡單，喺11月20日深圳啲銀行陸陸續續取消個政策。

有朋友同同事問我，浪人志係咪有內幕消息定係收到咩風，所以咁準。事實上，梗係唔係啦，如果我地有內幕消息一早就發咗達啦，你估我地係「數字叔」咩，話幾多萬點就幾多萬點。

其實用common sense就知呢個政府遲早摺埋啦。首先，因為深圳啲提款機週不時無錢，所以有時啲人會攞多少少，其次係好似EPS同信用咭呢類交易工具喺國內未大行其道，現金係主要嘅交易媒介，限制提款額只會令佢地日常生活極度不便。另外，有好多兩地嘅中小企業慣用現金交易，唔俾佢地攞咁多錢即係斷人米路啫，年終深港兩地經濟增長率低過預期點算﹖邊個敢負呢個責任﹖

好多人見到呢類消息於是紛紛由樂觀轉為悲觀，或者由悲觀轉為樂觀，最後先發覺中招，俾個市左一巴右一巴打到豬頭咁。佢地以為自己已經做足功課，所以判斷正確，應該無衰，但其實只係睇到表面嗰浸，仲未夠深思熟慮。

關於點樣分析市場資訊嘅方法，大家可以參下浪人兄嘅「資訊分析四步曲」，希望可以幫到大家。