本港大學生最缺乏誠信
我去過佢個網站，可惜搵唔到相關資料，連提都冇提過，只能夠用僅有o既資料分析。雖然唔清楚佢地個問題內容，不過佢地o既用字就好有問題。首先，咩叫”缺乏誠信”?唔知道佢地訪問市民個陣有冇定義清楚咩係”誠信”，但係調查結果就冇同人講佢地點了解”誠信”兩個字。因為指一個人缺乏誠信係好嚴重指控，用英文講即係話一個人係”Liar”，而且仲有近11%咁多。雖知道大學畢業生好多都係做Sales，例如閣下d保險經紀、財務顧問、股票經紀、地產經紀。如果有咁多人誠信有問題，咁你d錢就真可能凍過水。因為d無誠信o既經紀隨時搵左你d錢之後走佬。又或者d老細請個會計師返黎，點知個會計師日日穿佢櫃桶底。個調查結果係咪暗示班友係賊?但現實生活會唔會真係咁嚴重呢?又唔見得係。如果真係咁嚴重，咁d唔知係大學畢業o既學生仲咪可能仲無誠信呢?
第二，點為之工作態度呢?有冇具體指稱工作態度係具體活動，定係心態?莫知有d老細覺得準時返工放工都係態度不良，有待改善，日日OT先叫有熱誠。工作態度四字完全含糊不清，都明d調查員點様解釋俾d受訪者知道，定係d受訪者本身都烏sir sir，求其答完就算。
第三樣仲好笑，”精通”中英文普通話，佢地知唔知咩叫精通呀?同邊個比先?同莎士比亞、王爾德、傑克倫敦定係拜倫比先?定係要好似古德明咁先叫精通?呢條問題完全無point，精通呢個字係好高層級的比較詞，唔係隨便識睇”哈你波突”就叫精通，能夠受社會或文學界認同，或者可以成一家之言先叫精通呀嘛。而且d班友(受訪個d)自己語文都未必咁好，俾好野佢都唔識欣賞啦。莫知有d人仲以為學到一口自以為”京腔”就叫好叻普通話，其實自己學緊係土話方言。不過又難怪o既，而家用字誇張，明明滾水雲吞麵又話係上湯雲吞麵，後加爽滑彈牙超勁爆好食。咁樣用字法，明明普通都可以都叫精通。可以將文字空洞化(Nullify)到咁，只有香港人先可以做得到。
第四，d校長認畢業生唔夠國際視野。都係個樣啦，先唔講”視野”，咩叫國際呢?英美先係國際?日韓係唔係國際呢?拉脫維亞、土耳其、馬其頓係咪呢?泰國、金邊、不丹、孟加拉、東帝芠又係咪呢?芠來又算唔算呢，咁多藝人過去搵食，唔了解風土人情點得?
行文至此，己經覺得夠皮，再寫就浪費我d指力同時間。成個調查入面d關鍵字語焉不詳，不明所指，最少報章上公布o既結果係咁。大概所謂調查只係做做樣，最主要都係想出下名當做宣傳，又可以用黎同d家長講”我地同港大做過乜乜乜調查….”，好似好勁咁。全個調查俾唔到咩重要資訊，而且仲會令人對畢業生產生誤解，比”Junk”更可怕，所以佢個可靠性係0，分類係Venom。
可靠性(0-4): 0
分類: Venmon
相關網站:
香港專業教育網
http://www.education18.com/index_intro.htm#
蘋果日報
http://appledaily.atnext.com/template/apple/art_main.cfm?iss_id=20070727&sec_id=410
No comments:
Post a Comment